HATAW! D'yaryo ng Bayan hatawtabloid.com
PATAY ang isang pulis habang sugatan ang isa pa matapos ang insidente ng pamamaril sa bayan ng Guiguinto, lalawigan ng Bulacan, nitong Linggo ng gabi, 8 Marso.
Sa ulat ni P/Lt. Col. Librado Manarang, Jr., hepe ng Guiguinto MPS, kinilala ang biktimang si P/MSgt. Jose Uring na nakatalaga sa Provincial Intelligence Unit ng Bulacan PPO.
Samantala, kinilala ang nasugatan na si Jorilyn Acedera, residente sa Brooklyn Heights Subdivision, Brgy. Panginay, sa nasabing bayan.
Sa imbestigasyon, nilapitan ng hindi kilalang gunman si Uring dakong 9:57 ng gabi matapos ang isang caucus para sa nalalapit na halalan para sa Home Owners Association ng Brooklyn Heights Subdivision at binaril siya sa likod ng kaniyang ulo saka agad tumakas mula sa pinangyarihan.
Ilan sa mga saksi ang nagbato ng upuan sa tumakas na gunman na muling nagpaputok ng baril sa mga tao hanggang tamaan si Acedera sa kaliwang tuhod habang ang suspek ay patuloy na tumakas patungo sa direksiyon ng Block 9.
Isinugod ang mga biktima sa Guiguinto Polymedic Hospital kung saan idineklarang dead on arrival ang pulis habang naka-confine si Acedera at ginagamot dahil sa tama ng bala. (MICKA BAUTISTA)
