HATAW! D'yaryo ng Bayan hatawtabloid.com
DASMARIÑAS, CAVITE — MAGKASALO sa spotlight ang DLSU-Dasmariñas at University of Luzon matapos kapwa magwagi sa pagbubukas ng 32nd season ng National Capital Region Athletic Association (NCRAA) basketball championship na ginanap sa Dasmariñas Arena.
Pinatumba ng Patriots ang Asian Institute of Maritime Studies (AIMS), 91-77, sa isang kapanapanabik na sagupaan. Samantala, dinomina ng Golden Tigers ang Emilio Aguinaldo College-Cavite, 88-69.
Pinangunahan ni Mark Cuevas ang DLSU-D sa kanyang impresibong double-double na 25 puntos mula sa 9-of-14 shooting, 11 rebounds, tatlong assists at tatlong steals sa loob ng 28 minuto.
Sumuporta sina Kerwin Urate (13 puntos), JM Beyong (11) at Ronroy Bunda (10) upang maselyuhan ang panalo ng Patriots.
Nag-ambag din sina Pieter Jeuken (8), Gio Santiago (7), Billy Dela Rama (6), Adrian Quinones (5), Andrei Delos Reyes (4), Sanjeev Mintu (2) at Tristan Rosales na may dalawang steals.
Sa panig ng Blue Sharks, nagtala si GJ Gurrea ng 17 puntos at limang rebounds habang nagposte naman si JB Makabenta ng triple-double na 16 puntos, 11 rebounds at 10 assists ngunit hindi ito naging sapat upang maiwasan ang pagkatalo. Nagdagdag sina Mclarenz Manahan (8), CJ Francisco (6) at CJ Anos (6).
Sa ikalawang laro, pinangunahan ni Mikael Borja ang Golden Tigers sa kanyang game-high na 23 puntos mula sa 9-of-15 shooting sa loob ng 25 minuto.
Nag-ambag si Christian Esberto ng 16 puntos, anim na rebounds at limang steals habang may 11 puntos at siyam na rebounds si Ventax Begenio. Nagtala rin si Criatino Gallardo ng 10 puntos, walong rebounds at limang assists.
Sa Vanguards, nanguna si Ken Quillao na may 20 puntos at tatlong rebounds habang nagdagdag si JR Ilustrisimo ng 11 puntos at 10 rebounds.
Pormal na idineklara ni NCRAA General Manager Buddy Encarnado ang pagbubukas ng liga, hudyat ng panibagong yugto ng matinding kompetisyon at pagkakaisa sa collegiate basketball.
Dumalo bilang panauhing pandangal si Philippine Sports Commission chairman Patrick “Pato” Gregorio, na nagbigay-inspirasyon sa mga atleta.
“Sa lahat ng atletang nandito ngayon, sana ang ambisyon ninyo ay maging national athlete patungo sa Southeast Asian Games, Asian Games at Olympics,” ani Gregorio. (HNT)
