Fetus sa sewage facility ng eroplano nadiskubre

NATAMBAD sa mga awtoridad ang isang fetus sa loob ng sewage treatment facility ng isang eroplano sa Ninoy Aquino International Airport (NAIA) Terminal 1 habang isinasagawa ang regular na paglilinis at pagproseso ng waste materials mula sa mga eroplano.

Nabatid na kinokolekta ang mga waste material mula sa aircraft lavatories at dinadala sa sewage treatment facility bago tuluyang itapon.

Sa inisyal na imbestigasyon, pinaniniwalaang maaaring nagmula ang fetus sa isa sa mga flight na dumating sa NAIA Terminal 1 madaling-araw kahapon.

Limang eroplano ang kasalukuyang sinusuri ng mga awtoridad bilang bahagi ng kanilang pagtukoy sa pinagmulan ng insidente.

Batay sa nakalap na impormasyon, posibleng nailuwal ang fetus habang nasa ere ang eroplano at itinapon sa aircraft lavatory.

Sa kabila nito, wala pang opisyal na kompirmasyon hinggil dito at patuloy ang masusing imbestigasyon ng airport security at iba pang kinauukulang ahensiya.

Nakikipag-ugnayan ang pamunuan ng NAIA sa mga concerned airline personnel upang matukoy ang mga detalye ng pangyayari, kabilang ang flight manifests at iba pang mahahalagang impormasyon.