HATAW! D'yaryo ng Bayan hatawtabloid.com
NAARESTO ng mga awtoridad ang dalawang lalaking sangkot sa kasong pagnanakaw ng motorsiklo sa Brgy. Poblacion, sa bayan ng Norzagaray, lalawigan ng Bulacan, nitong Martes ng hapon, 17 Pebrero.
Batay sa ulat ni P/Lt. Col. Ismael Gauna, acting chief of police ng Norzagaray MPS, kinilala ang mga naarestong suspek na sina alyas Winston, 39 anyos, residente sa Brgy. Partida, Norzagaray; at alyas Ariel, 34 anyos, residente sa Brgy. Pulong Buhangin, Sta. Maria, Bulacan.
Ayon sa imbestigasyon, naganap ang insidente sa Calumpang Gitna, Brgy. Poblacion, sa bayan ng Norzagaray, nang iwan ng biktima ang kaniyang motorsiklo habang siya ay pupunta sa kliyente.
Sa pagbalik ng biktima sa lugar, naaktohan niya na ang kaniyang motorsiklo ay itinatali ng lubid sa isa pang motorsiklo at mabilis na tinangay ng mga suspek.
Agad na iniulat ang insidente sa barangay at sa pulisya hanggang sa isinagawang pagpapatrolya, napansin ng mga operatiba na nakatalaga sa MBS Bigte ang dalawang lalaki na sakay ng motorsiklo na walang helmet at may hinihila na isa pang motorsiklo.
Dahil dito, pinara ang mga suspek ng mga operatiba at hiningan ng mga kaukulang dokumento, ngunit hindi sila nakapagpakita ng kahit anong papeles.
Dinala ng mga operatiba ang dalawa para sa beripikasyon kung saan kinilala ng mga barangay tanod ang isang motorsiklo na ang nawawalang sasakyan na kinompirma rin ng may-ari nang dumating sa himpilan.
Ang mga naarestong suspek ay kasalukuyang nasa kustodiya ng Norzagaray MPS habang inihahanda ang kasong paglabag sa RA 10883 o Anti-Carnapping Act. (MICKA BAUTISTA)
