HATAW! D'yaryo ng Bayan hatawtabloid.com
PINARANGALAN si Coach Yeng Guiao ng Philippine Sportswriters Association (PSA) Awards Night sa Diamond Hotel sa pamamagitan ng President’s Award bilang pagkilala sa kanyang mahalagang tagumpay sa pagtatanggol ng pondo para sa pagpapaunlad ng palakasan sa bansa. Ang PSA Awards Night ay sa pangunguna ni President Francis Ochoa, mga officers na sina Nelson Beltran, Tito Talao, Gerry Ramos, at Dodo Catacutan kasama ang mga miyembro.
Matapos ang halos isang dekadang laban, nagbunga ang kanyang inisyatiba sa pamamagitan ng makasaysayang 15-0 desisyon ng Supreme Court of the Philippines na nag-aatas nang buong remittance ng nakalaang bahagi ng Philippine Sports Commission (PSC) mula sa Philippine Amusement and Gaming Corporation (PAGCOR) at Philippine Charity Sweepstakes Office (PCSO), alinsunod sa Republic Act 6847.
Sinimulan ni Guiao ang hakbang na ito noong 2016 habang siya ay nagsisilbing kinatawan ng Unang Distrito ng Pampanga sa Mababang Kapulungan ng Kongreso, katuwang ang kanyang abogado na si Atty. Jun Guzman. Ang nasabing desisyon ay magbibigay sa PSC nang buong limang porsiyento ng kabuuang kita ng PAGCOR at PCSO, retroaktibo, na inaasahang magreresulta sa bilyon-bilyong pisong karagdagang pondo para sa pambansang programa sa sports development.
Ang karagdagang pondong ito ay inaasahang magpapalakas sa grassroots programs, pagsasanay ng mga batang atleta, pagpapahusay ng coaching education, pagbili ng makabagong kagamitan, at pagbibigay ng wastong nutrisyon sa mga pambansang atleta.
Ang paggawad ng President’s Award kay Coach Guiao ay pagkilala sa kanyang hindi matatawarang ambag sa pagtataguyod ng kapakanan ng mga atletang Filipino at sa pangmatagalang pag-unlad ng palakasan sa bansa.
Isinagawa ang PSA Awards Night sa suporta ng Philippine Olympic Committee, MILO, Cignal TV, Premier Volleyball League, Philippine Basketball Association, Akari, Rain or Shine Elasto Painters, Capital Solar Energy, at Acrocity. (PSA/HNT)
