HATAW! D'yaryo ng Bayan hatawtabloid.com
NASAKOTE ang dalawang lalaking miyembro ng PNP-Maritime Group sa ikinasang anti-illegal logging operation sa Brgy. Poblacion, sa bayan ng Bustos, lalawigan ng Bulacan nitong Linggo, 15 Pebrero.
Sa bisa ng search warrant mula Malolos City RTC, sinalakay dakong 11:34 ng umaga kahapon ang isang compound sa naturang barangay kung saan natagpuan ang tatlong piraso ng Dao lumber na walang maipakitang kaukulang dokumento mula sa DENR, kaya agad itong kinompiska.
Ang Dao lumber ay mula sa malaking puno ng Dracontomelon dao, isang katutubong puno sa Filipinas na kilala bilang katamtaman hanggang sa mabigat na kahoy na may magandang grain o pattern.
Karaniwan itong ginagamit sa paggawa ng matitibay na muwebles, cabinet, flooring, pinto, at interior finishes dahil sa kaakit-akit nitong kulay.
Sa ulat, kinilala ng mga awtoridad ang mga naarestong suspek na sina alyas Ed at alyas Den na nakompiskahan ng aabot sa 1,063 board feet ng Dao lumber na tinatayang nagkakahalaga ng P103,162.
Dinala ang dalawang naaresto sa Northern NCR MARPSTA para sa imbestigasyon habang nasa kustodiya na ng DENR-PENRO Bulacan ang mga troso.
Kasalukuyang inihahanda ang kaukulang kaso laban sa dalawang suspek na isasampa sa piskalya. (MICKA BAUTISTA)
