Italian resto sa Alabang inararo ng SUV

SINORO ng isang sports utility vehicle (SUV) ang restaurant ng aktor at negosyanteng si Matteo Guidicelli sa Alabang, lungsod ng Muntinlupa, nitong Linggo, 8 Pebrero.

Sa isang post sa Facebook, sinabi ni Guidicelli na naganap ang insidente dakong 4:00 ng hapon kahapon sa Da Gianni Cucina Italiana restaurant sa Westgate Hub, Alabang.

Aniya, bumangga ang sasakyan sa al fresco area ng kanilang restaurant at masuwerteng walang mga kostumer nang maganap ang insidente dahil lahat ng kanilang mga kostumer ay nakaalis na dakong 1:30 ng hapon.

Samantala, dinala sa pagamutan ang dalawang tauhan ng establisimiyento upang sumailalim sa pagsusuri bagaman walang naiulat na malubhang nasugatan.

Aniya, napinsala ng pagbangga ng sasakyan ang labas na bahagi ng kanilang restaurant ngunit nananatiling bukas ang kainan sa loob nito.

Pansamantalang isinara ang al fresco ng kanilang restaurant para sa pagkukumpuni.