Bato ‘wag kumuha ng suweldo

KUNG hindi pumapasok, mas mainam na huwag kumuha o tumanggap ng suweldo.

Payo ito ni Senate President Vicente “Tito” Sotto III kay Sen. Ronald “Bato” dela Rosa para mabawasan ang pressure sa kanyang opisina.

Ayon kay Sotto, wala pa rin silang komunikasyon ni Dela Rosa kaya puwedeng huwag muna niya tanggapin ang suweldo hangga’t hindi siya pumapasok.

Ani Sotto, tuloy ang trabaho ng opisina ni Dela Rosa at nakapaghahain sila ng mga panukalang batas, resolusyon, at nakapagbibigay ng rekomendasyon sa ibang Bills.

Idinagdag ni Sotto, hindi na siya magtataka kung may maghain ng reklamo sa Ethics Committee laban kay Dela Rosa.

Inamin ni Sotto na walang rules ang Senado sa mga hindi pumapasok na senador at wala rin nakalagay sa Konstitusyon.

Aniya, may natatandaan siyang isa o dalawang congressman na minsan lang pumasok sa isang buong taon pero walang ginawa ang Kongreso at wala rin namang nagreklamo. (NIÑO ACLAN)