HATAW! D'yaryo ng Bayan hatawtabloid.com
MATAGUMPAY na naaresto ng mga operatiba ng Bustos MPS, katuwang ang Tracker Team, PIT Bulacan West/RIU3, Angeles City Police Office PS 3, at Bacolor MPS, ang isang indibiduwal na nakatalang No. 2 most wanted person sa provincial level ng Angeles City Police Office sa bisa ng warrant of arrest sa Brgy. Tibagan, Bustos, Bulacan nitong Linggo ng tanghali, 1 Pebrero.
Sa ulat ni P/Capt. Heherson Zambale, OIC ng Bustos MPS, kinilala ang naarestong suspek na si alyas Berto, 39 anyos, residente sa Brgy. Pulong Maragul, Angeles, Pampanga.
Isinilbi sa suspek ang warrant of arrest para sa kasong paglabag sa Section 5(B) ng RA 9262 o ang Anti-Violence Against Women and Their Children Act of 2004 na inisyu noong 15 Enero 2026 ni Presiding
Judge April Joy B. Magsayo-Aguila, ng Angeles City, Pampanga RTC Branch 61 na may rekomendasyong Service of Sentence.
Ipinaalam sa naarestong suspek ang kaniyang mga karapatang konstitusyonal at kasalukuyang nasa kustodiya ng Bustos MPS bago isailalim sa korteng pinanggalingan ng warrant.
Pahayag ni P/Col. Angel Garcillano, provincial director ng Bulacan PPO, ang matagumpay na pag-aresto sa naturang wanted person ay patunay ng pinaigting na kampanya ng pulisya laban sa kriminalidad at ng epektibong koordinasyon ng iba’t ibang yunit ng pulisya.
Ito ay bilang bahagi rin ng patuloy na pagsisikap na mapanatili ang kapayapaan at kaayusan sa Bulacan at mga karatig-lalawigan. (MICKA BAUTISTA)
