Puganteng most wanted rapist ng Bicol natunton sa Bataan

MATAGUMPAY na naaresto ng magkatuwang na mga operatiba ng Police Regional Office 3 (PRO3) at Police Regional Office 5 (PRO5) ang isa sa mga most wanted person sa Bicol Region nitong Linggo, 24 Agosto, sa bayan ng Morong, lalawigan ng Bataan.

Kinilala ang suspek na si Vince Gelvero, 43 anyos, nakatala bilang Top 10 sa Regional MWP sa Region 5 at Top 3 sa Provincial MWP sa Camarines Sur na pinaghahanap ng batas para sa mga kasong statutory rape at rape by sexual intercourse.

Ang pag-aresto sa akusado ay bunsod ng inilabas na warrant of arrest ni Presiding Judge Rima Orbon Ortega ng Iriga City, Camarines Sur RTC Family Court Branch 7 para sa apat na bilang ng kasong statutory rape; dalawang bilang ng kasong rape by sexual intercourse; at tatlong bilang ng kasong statutory rape by sexual intercourse.

Isinagawa operasyon ng mga operatiba ng Morong MPS sa pakikipag-unayan ng mga tauhan ng Bato MPS, Camarines Sur PPO, Bataan 1st at 2nd PMFC, Bataan IU, Maritime Law Enforcement Team, RIU, at 302nd MC RMFB3.

Kaugnay nito, pinapurihan ni PRO3 Regional Director P/BGen. Ponce Rogelio Peñones, Jr., ang operating team sa pagkakaaresto sa akusado na itinuturing na malaking banta sa seguridad ng kababaihan. (MICKA BAUTISTA)