Ayaw mag-ambag sa inuman, 2 tindero patay sa saksak

NAUWI sa trahedya ang isang inuman sa bayan ng Pili, lalawigan ng Camarines Sur matapos saksakin ng isang tindero ang dalawang kapwa niya tindero matapos tumangging mag-ambag ng pera pambili ng alak nitong Lunes ng gabi, 23 Hunyo.

Kinilala ni P/Lt. Col. Malu Calubaquib, tagapagsalita ng Police Regional Office 5, ang mga biktimang sina Mario Mansigin at Gaspar Felipe.

Base sa paunang imbestigasyon, nag-iinuman ang mga biktima at ang suspek na kinilalang si Novo Tadulma, nang hingan sila ng huli ng perang pambili ng alak.

Nagalit ang mga biktima na nauwi sa mainitang pagtatalo hanggang kumuha ng kutsilyo ang suspek saka pinagsasaksak ang mga biktima.

Dinala ang mga biktima sa pagamutan kung saan sila idineklarang wala nang buhay.

Samantala, nadakip si Tadulma ng mga nagrespondeng mga pulis at kasalukuyang nasa ilalim ng kustodiya ng Pili MPS.