HATAW! D'yaryo ng Bayan hatawtabloid.com
HANDANG-HANDA na ang San Juan City government sa pagdiriwang ng Wattah Wattah Festival, kasabay ng kapistahan ng San Juan Bautista na mahigpit na babantayan ang mga kalye at tanging sa itinalagang “Basaan Area” lamang magaganap ang buhusan upang walang madamay sa mga ayaw mabasa sa gaganaping piyesta.
Gagawing organisado at kontrolado ang “Basaan Area” mula Guevarra St., daraan sa Pinaglabanan St., hanggang N. Domingo St., lamang at magaganap ang basaan mula 7:00 ng umaga hanggang 2:00 ng hapon.
Ayon kay Mayor Francis Zamora, may nakaabang na multang P5,000 at makukulong ng 10 araw sa mga pasaway na San Juaneño na irereklamong lumabag sa Wattah Wattah Festival 2025 Ordinance No. 14.
Kasabay nito ang pagbabantay ng mahigit 300 pulis ng San Juan City para mas maipatupad ang ordinansa, katuwang ang mga barangay officials at tanod na huhuli sa mga pasaway at hindi sumusunod sa batas na tulad ng nag-viral na si Boy Dila na garapalang nambasa ng motorista.
“Sa totoo lang gusto ko siguraduhin pagkatapos ng nangyari last year, gusto ko pong siguraduhin na ang kapistahan natin ngayon ay magiging tahimik, payapa at maayos. Ayoko na po maulit ‘yung nangyari noong nakaraang taon. Nakita naman po natin ‘yung nangyari last year ito po ay nagsilbing hudyat ng pagbabago na ating isasagawa ngayon.
“Kung gusto n’yong makipagdiwang sa ating kapistahan papasok po kayo sa basaan zone. Ibig sabihin ginusto ninyong makipagbasaan. Sa lahat po ng mga daraan ng San Juan, kung kayo po ay daraan upang pumasok sa eskuwela o trabaho ay ‘wag ho kayo mag-alala hindi ho kayo mababasa basta kayo po ay nasa labas ng basaan zone,” paliwanag ng alkalde.
Samantala, aprobado na ng Malacañang na legal holiday ang June 24 bilang araw ng San Juan. (VICK AQUINO)
