Sa Makati
MAG-INA PATAY SA TRUCK VS MOTORSIKLO

HINDI nakaligtas sa kamatayan ang isang ina at kaniyang 15-anyos anak na lalaki matapos mabangga ng isang truck ang kanilang sinasakyang motorsiklo sa Brgy. San Antonio, lungsod ng Makati, nitong Sabado, 14 Hunyo.

Kinilala ng Southern Police District (SPD) ang mga biktimang sina alyas Rhecy, 40 anyos, at kaniyang anak na si Jade, 15 anyos.

Ayon sa mga awtoridad, naganap ang insidente dakong 4:30 ng hapon kamakalawa habang parehong binabagtas ng motorsiklo at ng truck ang northbound lane ng Buendia-Osmeña Flyover, mula A. Arnaiz Avenue patungong Zobel Roxas Street.

Nang makarating sa flyover, bumangga ang unahang kanang bahagi ng truck sa kaliwang bahagi ng motorsiklo.

Dahil sa lakas ng impact, nawalan ng kontrol ang mga biktima sa kanilang sinasakyang motorsiklo, dahilan upang mahulog sila sa kasada, saka nagulungan ng likurang bahagi ng truck ang kanilang mga ulo at katawan.

Dahil sa malalang pinsala sa kanilang mga katawan, agad namatay ang mga biktima.

Patuloy ang imbestigasyon ng mga awtoridad sa insidente habang kasalukuyang nasa kustodiya ng Makati CPS ang driver ng truck.