HATAW! D'yaryo ng Bayan hatawtabloid.com
WALANG makalalapit kay Woman National Master Arvie Lozano kapag nasa paligsahan na siya.
Gaya ng inaasahan, ang Bangkok, Thailand based na si Lozano ay nakakuha ng perpektong 5.0 puntos upang magkampeon sa ika-3 Vientiane Open FIDE Rated Standard Chess Tournament na ginanap noong 31 Mayo hanggang 1 Hunyo 2025 sa National Olympic Committee, Vientiane Capital, Laos.
Si WNM Lozano, na naglalaro para sa Manila Load Manna Knights sa Professional Chess Association of the Philippines (PCAP), ay nakakuha ng 1 milyong kip na premyo at tropeo sa pagkapanalo sa FIDE standard tournament, na may mahigit 45 kalahok.
Tinalo niya sina Sean Michael Manalo ng Filipinas sa unang round, Mark Goodrich ng England sa ikalawang round, Woman Candidate Master Inthavong Maly ng Laos sa ikatlong round, Phaktong Vilaphen ng Laos sa ikaapat na round, at si Yupan Fan ng China sa ikalima at huling round.
“Gusto kong ialay ang aking tagumpay sa aking mga kababayan,” sabi ni WNM Lozano, dating pangunahing manlalaro ng multi-titled Rizal Technological University noong kanyang mga panahon sa kolehiyo.
Si Souminta Yomvilath ng Laos ay pumangalawa na may 4.5 puntos, kasunod sina Zirui Wang ng China, Yupan Fan ng China, Bounthanh Inthavong ng Laos, Khonsavanh Senglek ng Laos, at Zhiyuan Tan ng China na nakakuha ng tig-4.0 puntos. (MARLON BERNARDINO)
