HATAW! D'yaryo ng Bayan hatawtabloid.com
SASAGUPA ngayong araw ang mga bigating sabungero mula sa iba’t ibang panig ng mundo para sa unang araw ng eliminasyon ng ikalawang edisyon ng 2025 World Slasher Cup 9-Cock Invitational Derby sa makasaysayang Smart Araneta Coliseum.
Nasa 70 soltada ang nakatakdang magsagupa para sa unang araw ng eliminasyon ngayong araw na magsisimula mamayang 1:00 ng hapon.
Sasabak sa unang round ng eliminasyon sina legendary breeder/cocker Nene Abello, two-time WSC champ Honey Yu, Dela Cruz brothers, master breeder Joe Alimbuyugen, Jimmy Junsay, Anthony Ramos, Tony Tumalad, Carrie Chua, Engr. Emer Sumigad, Fiscal Moises Villanueva, Dicky Lim, Doc Ayong Lorenzo, Jojo Gatlabayan, Raffy Turingan, Mike Romulo, James Uy, eight-time WSC champ Frank Berin, at ilan pang mga bigating sabungero.
Ang mga sabungerong nakapagtala ng tig-dalawang panalo ay awtomatikong pasok sa 3-cock semi-finals sa Biyernes, Mayo 23, habang ang mga kalahok na nakapagtala ng tig-isang panalo at isang talo ay mananatili pa rin sa kompetisyon para sa inaasam na titulo.
Sa mga nais masaksihan nang live ang nasabing derby sa Smart Araneta Coliseum ay maaari bumili ng ticket sa Ticketnet o ‘di kaya sa http://www.worldslashercup.ph. (HNT)
