Helper na suspek sa panggagahasa timbog sa Muntinlupa

NADAKIP ng mga awtoridad ang 18-anyos lalaking nakatala bilang ikatlong wanted person dahil sa kasong panggagahasa sa lungsod ng Muntinlupa, nitong Biyernes, 7 Pebrero.

Kinilala ng pulisya ang suspek na si alyas Nono, 18 anyos, residente sa Brgy. Putatan, at naaresto sa Brgy. Tunasan, parehong sa nabanggit na lungsod.

Isinagawa ang operasyon laban sa suspek ng 13 tauhan ng Muntinlupa CPS Warrant and Subpoena Unit sa pangunguna ni P/EMS. Renante Jesalva.

Dinakip si alyas Nono sa bisa ng warrant of arrest na inilabas ni Presiding Judge Wehrly Gutierrez-Mendez ng Muntinlupa RTC Family Court Branch 8 na may petsang 30 Enero 2025 at may inirekomendang piyansang P200,000.

Kasalukuyang nasa kustodiya ng Muntinlupa CPS ang suspek para sa kaukulang disposisyon at dokumentasyon.