HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
PANALO sa ganda at tema ng istorya para sa amin ang My Future You na pinagbibidahan nina Francine Diaz at Seth Fedelin.
Isa kami sa naimbitahan sa Red Carpet Premiere ng My Future You na entry ng Regal Films sa Metro Manila Film Festival 2024 at wala kaming masyadong expectation sa pelikula. Ipinagpalagay agad namin na isa lamang iyong ordinaryong romance movie o pa-cute, kilig-kiligan movie.
Subalit nagkamali kami. Napa-wow! kami sa ganda ng istorya at pagkakadirehe ni Crisanto Aquino sa pelikula dahil napakaganda ng twist.Siyempre hindi na namin babanggitin dahil baka sabihin ninyong panira kami sa kuwento.
Masasabi naming isa ito sa best movie na idinirehe ni Aquino at pwedeng ipagmalaki ng FranSeth.
Pampamilya at tamang-tamang sa tema ng Pasko ang istorya. Na may isang tagpo roon ang nagpaluha sa amin. Nagulat na nga lang kami na biglang nabagbag ang aming damdamin sa tagpong iyon na tiyak makatatawag ng pansin sa mga manonood.
Hindi papahuli ang My Future You sa siyam pang entry sa 50th MMFF dahil maayos ang pagkakalatag ng istorya, hindi rin boring, at exciting ang kabuuan ng pelikula.
Iikot ang kuwento sa buhay kina Karen (Francine) at Lex (Seth) na nagkilala sa pamamagitan ng isang dating app. Kung ano ang nangyari after nilang magkakilala hindi na namin pa masyadong ikukuwento dahil mas magandang kayo na mismo ang maka-discover ng kagandahan ng istorya ng dalawa.
Sa pelikulang ito namin na-discover na magaling palang magpakilig ang dalawa. Kaya nga may mga nagkomentong naalala nila sa dalawa ang KathNiel na mahusay din sa pagpapakilig sa mga pelikulang ginawa. Kaya hindi naiwasang maghiyawan ang audience sa bawat pasabog at paandar na eksena during ng mga ito.
Malaki rin ang improvement ng akting ni Seth samantalang si Francine ay talaga namang nahuhusayan na kami even before pa sa kanyang mga serye sa ABS-CBN.
Kasama rin sa pelikula sina Christian Vasquez, Almira Muhlach, Vance Larena. Sinuportahan naman ang FranSeth nina Star Magic head Lauren Dyogi, director Mae Cruz-Alviar, at mga kaibigang sina Jameson Blake, KD Estrada. at Alexa Ilacad.
Naroon din sa premiere night siyempre ang producer ng pelikula, ang mag-inang Roselle at Keith Monteverde.
Mapapanood ang My Future You simula December 25. Isa ang pelikulang ito sa hindi dapat palampasin dahil isa ito sa maganda na ang istorya at pwede pang ipagmalaking pelikula.
