ARESTADO ang apat katao dahil sa alegasyong pagpupuslit ng sako-sakong asukal sa Brgy. Cawit, sa lungsod ng Zamboanga, nitong Lunes, 11 Nobyembre.
Nasakote ang tatlong driver ng truck at isang pahinante sa ikinasang oeprasyon sa Baradero de Cawit shipyard, sa nabanggit na lungsod.
Natagpuan ng mga awtoridad ang dalawang truck na may kargang hindi bababa sa 900 sako ng asukal.
Kahaharapin ng mga suspek ang mga kasong paglabag sa RA 10611 o Food Safety Act of 2013, at RA 10845 o Anti-Agricultural Smuggling Act of 2016.
Patuloy ang pagsasagawa ng imbestigasyon upang matukoy ang pagkakakilanlan ng may-ari ng nasamsam na kontrabando sa operasyong pinangunahan ng mga tauhan ng Bureau of Customs (BOC) Special Operations Unit- RID 9 (SOU-RID 9) sa pakikipagtulungan ng Zamboanga CPS 9.
