Ivana muling namudmod ng pera

KAPURI-PURI na naman ang ginawang pamamahagi ng blessings ng Kapamilya actress na si Ivana Alawi kamakailan.

Nagpanggap kasing tindera ng sampaguita si Ivana malapit sa simbahan ng Antipolo. Roo’y sinusuklian niya ng mas malaking halaga ang sinumang nagbigay sa kanya ng pera.

Sa vlog ni Ivana, ipinakita nito ang pagtitinda ng sampaguita na sa tuwing may nag-aabot sa kanya ng pera ginagawa niyang  x1000 pabalik. 

“Sobrang meaningful at sobrang special ng church na ito sa akin kasi noong bata ako, nag-alay lakad kaming dalawa ng ate ko from Sta. Mesa all the way to Antipolo,” paliwanag ni Ivana kung bakit doon niya napiling mamigay ng pera. 

Tinupad aniya ng Panginoon ang hiling niya noon kahit na pakiramdam niya ay imposible.

“Sobrang imposible ng wish ko. Kahit ako parang sabi ko parang imposible namang mangyari ito pero kung mangangarap na lang ako, taasan ko na,” sabi pa ng aktres.

Anim ang masuwerteng nabigyan niya ng pera. Tatlo ay nagtitinda, isang enforcer, at dalawang tricycle driver.

At lahat ay nagpapasalamat kay Ivana sa sorpresang handog ng aktres sa kanila.