HATAW! D'yaryo ng Bayan hatawtabloid.com
SWAK sa kulungan ang isang lalaki na wanted sa kasong murder matapos maaresto ng pulisya sa isinagawang manhunt operation sa Valenzuela City, kamalawa ng gabi.
Kinilala ni Valenzuela City police chief P/Col. Salvador Destura, Jr., ang naarestong akusado na si alyas Ronnie, 36 anyos, residente sa Brgy. 164, Talipapa, Quezon City.
Sa kanyang ulat kay Northern Police District (NPD) Director P/BGen. Rizalito Gapas, sinabi ni Col. Destura nakatanggap ang mga operatiba ng Station Intelligence Section (SIS) ng impormasyon na naispatan ang presensiya ng akusado sa Pinalagad, Brgy. Malinta.
Kaagad bumuo ng team ang SIS sa pangunguna ni P/Cpt. Ronald Sanchez saka nagsagawa ng manhunt operation kontra wanted persons na nagresulta sa pagkakadakip sa akusado dakong 9:15 pm sa Area 4, Pinalagad, Brgy. Malinta.
Ayon kay P/Cpt. Sanchez, si alyas Ronnie ay inaresto sa bisa ng order of arrest na inisyu ni Presiding Judge Arthur B. Melicor ng Valenzuela City Regional Trial Court, Branch 284, noong 23 Hunyo 2023, sa kasong Murder.
Pansamantalang ipiniit ang akusado sa Custodial Facility Unit ng Valenzuela police habang hinihintay ang pagpapalabas ng commitment order mula sa korte. (ROMMEL SALES)
