Most wanted ng NPD huli sa loob ng city jail

INARESTO ng pulisya sa loob ng kulungan ang isang lalaki na wanted at Top 1 Most Wanted Person (MWP) ng Northern Police District (NPD) sa kaso ng pagpatay sa Caloocan City, kamakalawa ng hapon.

Kinilala ni Caloocan police chiief P/Col. Ruben Lacuesta ang suspek sa alyas Boyd, 41 anyos, residente ng Brgy. 176 ng lungsod at nakatala bilang No. 1 top most wanted person ng Northern Police District (NPD).

Sa kanyang ulat kay NPD Director P/BGen. Rizalito Gapas, sinabi ni Col. Lacuesta na nagsagwa ang mga tauhan ng IDMS – Warrant and Subpoena Section sa pangunguna ni P/Major Jeraldson Rivera ng manhunt operation kontra wanted persons nagresulta sa pagkakaaresto sa akusado, 4:45 ng hapon.

Ani Major Rivera, ang akusado ay inaresto nila sa bisa ng warrant of arrest na inisyu ng Caloocan City Regional Trial Court Branch 129, noong September 29, 2023 para sa kasong Murder.

Ang akusado ay kasalukuyang nakapiit sa Caloocan City Jail sa Talimusak St., corner Tanigue St., Dagat-dagatan matapos maaresto sa hindi nabanggit na kaso. (ROMMEL SALES)