David may dahilan ang pagiging suplado at isnabero

MA at PA
ni Rommel Placente

SA interview ni David Licauco sa 24 Oras, nagpaliwanag siya kung bakit may mga pagkakataong tahimik lang siya, na hindi siya kumikibo, na inaakala tuloy ng ibang tao na suplado at isnabero siya sa tunay na buhay.

Paliwanag ng binata, ang pagiging tahimik niya ay may kinalaman sa sa kanyang health condition na tinatawag na sleep apnea. Ito ay isang sleep disorder na tumitigil kung minsan ang paghinga ng taong mayroon nito habang siya’y natutulog.

Sabi ni David, plano niyang magpa-opera dahil sa kanyang kondisyon pagkatapos ng primetime series nila ni Barbie Forteza sa GMA 7 na Maging Sino Ka Man.

“Gusto ko nang magpaopera after this show (Maging Sino Ka Man), so hopefully I find the time na magawa ko ‘yun, kasi I think sleep is the best gift by God,” sabi ni David.

Tungkol naman sa napapagkamalan siyang suplado, ang sabi niya, may konek ito sa kanyang kondisyon.

“I tend to be, parang iniisip ng mga tao na mataray ako, suplado, but actually may napi-feel kasi ako sa umaga na bigat eh, so parang wala ka sa mood, so I had to work out,” paliwanag pa niya.

Nauna rito, ibinalita na rin ni David last June, 2023 ang pagkakaroon niya ng sleep apnea na siya ring nagiging dahilan ng pagiging late niya kung minsan sa taping ng kanyang projects.

“My breathing stops for like mga 30 seconds straight, 24 times in an hour. So, all throughout the night, hirap ako eh. So stressed ako. So paggising ko sa umaga, I’m stressed also,” aniya pa.