HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
AMINADO si Krissha Viaje na napakalaking pressure sa kanya ang pagbibida sa pagpapatuloy ng kuwento ng University Series, ang Safe Skies, Archer katambal si Jerome Ponce.
Malaking tagumpay ang unang University Series, ang The Rain in Espana na pinagbidahan nina Marco Gallo at Heaven Peralejo kaya hindi maiaalis na ikompara ang Safe Skies, Archer nina Krissha at Jerome.
Pero tiwala naman kapwa sina Krissha at Jerome ba mapagtatagumpayan nila ang bagong kuwento sa serye na handog ng Viva One Original dahil nakasuporta rin ang mga dating kasama sa The Rain in Espana tulad nina Bea Binene, Aubrey Caraan, Gab Lagman, Nicole Omillo, Andre Yllana, at Frost Sandoval. Idagdag ang mga bagong karakter nina Jairus Aquino at Hyacinth Callado.
Ang Safe Skies, Archer ay ididirehe ni Gino Santos na nakilala sa kanyang mga hit movies na Ex With Benefits at Love Me Tomorrow, at ang kakatapos lang na youth series na Teen Clash.
Patutunayan ng Safe Skies, Archer nabuhay na buhay pa rin ang University Series fever! Kasama ang TRIEKADA, na tinatawag ngayong UNIVERKADA.
At ngayon, ang love story naman ni Yanna (Krissha) ang mapapanood natin sa second book ng University Series na isinulat ni Gwy Saludes na mayroon nang mahigit 600 million reads sa Wattpad.
May tatlo ring bagong characters na ipakikilala sa Safe Skies, Archer na matagal nang inaabangan ng lahat ng fans. Ang hunk actor na si Jerome ang gaganap na Hiro, ang dashing young pilot at mechanical engineering student na magkakaroon ng no strings attached relationship with Yanna. Ang promising young actor na si Jairus na gaganap bilang Shan, ang best friend ni Hiro at romantic charmer na paiibigin si Kierra (Nicole). Ang talented singer-actress at newcomer na si Hyacinth ay gaganap naman bilang Elyse, ang half-sister ni Shan na may crush kay Hiro, pero ang hindi niya alam ay si Sevi (Gab) pala ang nakatadhana para sa kanya.
Mula sa kuwento nina Luna at Kalix sa The Rain in España, love story naman nina Yanna at Hiro ang susunod na aabangan. Si Yanna, isang tourism student ay kilalang wild, bold, adventurous at non-committal pagdating sa pag-ibig. Pero mababago ang buhay (at sex life) niya nang makilala si Hiro. Ang no-label relationship nila na una nilang pinagkasunduan ang siya ring magbibigay sa kanya ng problema. Unti-unti siyang mahuhulog kay Hiro kahit na alam niyang hindi magtatagal ang kanilang relasyon. After five years, muli silang magkikita, matured at mga professional na, at mari-realize rin nila na hindi pa sila nakaka-move on sa isa’t isa. May chance na kaya ngayon na magkaroon na ng label ang kanilang relasyon?
Mapapakinggan din sa series ang new set of soundtracks na magdaragdag ng kilig at hugot sa Safe Skies, Archer na mula sa music genius at founder ng OC Records na si Kean Cipriano. Ang KISAME ni Rhodessa na mayroon ng 24 Million streams sa Spotify at ang kantang ISIP ng Healy After Dark na puno ng dreamy vibe naman ang magiging official soundtracks ng series.
Kay sa October, ibang level ng pag-ibig ang hatid ng love story nina Yanna at Hiro. Pero bago ‘yan, may exclusive sneak peek muna para sa preparations ng exciting series na ‘to! Ang one-hour docu-special na READY FOR TAKEOFF: THE ROAD TO ‘SAFE SKIES, ARCHER’ na mapapanood sa September 6, streaming exclusively sa Viva One.
