PH chess genius sasabak sa Dumaguete FIDE Rated Age Group Chess Championships

MANILA — Ipakikita ni Philippine chess genius Michael Jan Stephen Rosalem Inigo ng Bayawan City, Negros Oriental ang kanyang talento sa NC64 FIDE Rated Age- Group Invitational Chess Championships 18 and under division sa Sabado, 19 Agosto, sa Silliman Hall, Silliman University sa Dumaguete City, Negros Oriental.

Ang 15-anyos na si Inigo, grade nine student ng Bayawan City Science and Technology Education Center (BCSTEC) sa Bayawan City, Negros Oriental, ay binihag ang mundo ng chess nang manalo ng ginto sa 2019 Davao City Palarong Pambansa Elementary Boys Team Blitz event, na nakikipagtulungan kay Jerish John Velarde, kumakatawan sa Rehiyon VII (CVIRAA).

Sina Inigo at Velarde ay nanalo rin ng Bronze Medal sa Elementary Boys Team Standard. Nakuha niya ang Bronze Medal sa kategoryang Elementary Boys Individual Blitz.

Ngayong taon, nakipagtulungan si Inigo kay Daniel Baylosis, na kumakatawan sa Rehiyon VII – CVIRAA na nagtapos na 5th placers, ginanap sa Marikina City.

“I hope to perform well in this event NC64 FIDE Rated Age- Group Invitational Chess Championships 18 and under division,” ani Inigo, na siya rin 2019 Palawan National Batang Pinoy Bronze Medalist sa Blitz Category Elementary Boys side.

Ayon kay tournament director National Arbiter Antonio Martin Olendo, ang iba pang sasabak ay sina Christian Pelione, Vhea Ashley Silvano,  Lance Nathaniel Orlina, Joemel Narzabal, Aeralyn Sinining,  Chester O. Acuyong, Shawn Augustine Paril, Lennox P. Samson, Jecuambs Cuambot,  Denise Nicole D. Noble, at Einre Mar Abanco.

Samantala, sina Markley Partosa, Beau Adriel Pagayona, Iana Angela B. Sotaridona, at Ellaine Summer Abanco ay kabilang sa nangungunang contenders sa 13 and under division.

“Huling ginamit ang Silliman Hall sa isang major chess event at iyon ay noong 2013 – Palarong Pambansa, na ang Dumaguete City ang naging host ng pinakamalaking taunang panoorin ng DepEd,” ani National Arbiter Antonio Martin Olendo. (MARLON BERNARDINO)