Obrero kinasuhan ng rape-slay sa 12-anyos

SINAMPAHAN ng kaukulang kaso ng pulisya ang construction worker na nanghalay at pumatay sa 12-anyos dalagita noong Biyernes ng madaling araw sa Muntinlupa City.

Ayon kay Muntinlupa police chief Senior Supt. Roque Vega, kasong Rape with Murder ang ikinaso kay Reynante Odono, 26, tubong Sorsogon at naninirahan sa 7-A Extension Ylaya St., Alabang, matapos ituro ng testigo na siyang may kagagawan sa pagpatay at paggahasa sa biktimang si Stephanie Cristel, residente ng 207 T. Molina St., Alabang.

Natagpuan ang bangkay ng dalagita sa ikalawang palapag ng ginagawang gusali katabi ng kanilang tirahan dakong 3:30 ng madaling araw, Biyernes, Agosto 13, matapos hanapin ng kanyang amang si Ronald Elba.

Sa imbestigasyon ng pulis-ya, puwersahang pinasok ng suspek na umano’y lango sa ilegal na droga ang biktima sa unang palapag ng kanilang tirahan dakong 3:00 ng madaling araw habang natutulog sa ika-lawang palapag ng bahay ang  kanyang mga magulang.

Puwersahan binuhat ng suspek ang dalagita at dinala sa ginagawang gusali at dito isinagawa ang krimen.

Nang manlaban umano ang biktima, sinakal siya ng suspek hanggang mamatay.

Pagkaraan ay natagpuan  ni Ronald ang anak na gulagulanit na ang damit at walang malay kaya’t mabilis nilang isinugod sa Alabang Medical Center ang bata ngunit idineklarang dead on arrival.

Sa follow-up operation ng pulisya, agad nadakip ang suspek.                 (JAJA GARCIA)