HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
NAKABIBILIB ang concern ni Overseas Workers Welfare Administration (OWWA) Arnell Ignacio hindi lang sa mga Overseas Filipino Workers (OFW) na tinutulungan nila pero maging sa mga empleado ng kanyang departamento.
Aminado si Arnell na 24 hrs halos o sobra-sobra sa walong oras ang inilalaan nilang oras para makapagtrabaho sa OWWA kaya naman apektado na ang kanilang kalusugan. Nariyan ang sobrang pagpupuyat, ‘di pagkain ng tama at healthy food, at sobra-sobrang stress.
“It’s a continuous effort,” ani Arnell. “Hindi natatapos ang trabaho namin sa paglubog ng araw. Here, we work 24/7.”
Actually mas busy pa nga raw siya ani Arnell kompara noong artista siya.
“Sa showbiz ganoon din ginagawa namin eh, tuloy-tuloy ang trabaho. Pero iba ang stress dito sa OWWA and for good reason. Kasi buhay ng ating mga bayaning OFW ang pinag-uusapan. Hindi ka puwedeng basta-basta na lang.”
Kaya naman inilunsad nila, kasama si OWWA Deputy Administrator Honey Quiño, health campaign sa OWWA.
“It’s not an easy task,” sambit pa ni Arnell. “It’s taxing on the mind, body.”
“Dahil sa dami ng trabaho, wala na akong exercise. Hangga’t maaari kapag may free time, tini-take advantage ko ito to get some much needed sleep.”
Kahit ang anak ni Arnell ay hindi na rin niya nakikita sa rami ng trabaho sa OWWA.
“Kasi tila hindi lang ako ang nakalimot na sa benepisyo ng ehersisyo rito. Dahil sa aming trabaho, marami sa amin ang out of shape, lethargic, walang energy and I think we have to take care of ourselves as well. So, I thought, maybe it’s time we implement something that would somehow mitigate that.”
Matapos ang media conference ipinakita nina Arnell at Honey kasama ang mga empleado ng OWWA ang Zumba dance session.
“Bukod sa maganda ang benepisyo nito sa katawan eh, may benepisyo rin ito sa maayos na pag-iisip dahil masaya,” giit pa ni Arnell.
