Andrew Gan, uhaw sa challenges sa showbiz

ALAM MO NA!
ni Nonie Nicasio

MAGANDANG exposure kay Andrew Gan ang katatapos lang na patok na Kapamilya TV series na 2 Good 2 Be True na tinampukan nina Kathryn Bernardo at Daniel Padilla.

Nabanggit ni Andrew na ibang klaseng experience sa kanya ang makatrabaho ang KathNiel.

Aniya, “A iba, iba talaga ang KathNiel, dito ko napatunayan… kahit hindi naman ako nagtagal doon, dahil patapos na ito nang pumasok ako, pero iba talaga ang Kathniel. Iba ang lakas ng hatak nila at totoong tao talaga sila…

“Sabi ko nga po, iba ang naitulong sa akin ng show na ito. Kasi ang tawag ng mga tao sa akin ay Jomari, ito ‘yung name ng character ko sa KathNiel series po e. So, yes po, sana ay makatrabaho ko sila ulit,” sambit ni Andrew.

Anyway, si Andrew ay talent na ngayon ni Tyrone Escalante ng TEAM. Pumirma siya kamakailan sa talent management ni Tyrone, kasama sina Polo Ravales at Chanel Morales. Ang Tyronne Escalante Artist Management o TEAM ni Tyronne ang nagpasikat kina Kelvin Miranda at Jane De Leon na tampok sa seryeng Darna.

Nagkuwento si Andrew sa kanyang bagong talent management, “Nag-start po ako kay Sir Rams David, five years po ako sa kanya at sobrang thankful po ako, then kay Sir Leo Dominguez, na thankful din po ako.”

Ayon kay Andrew, walang problema sa kanila ni Leo at maayos silang naghiwalay. “Mutual naman po iyon, okay po kami ni Sir Leo, maayos po ang pahihiwalay namin.”

Esplika ng aktor, “I’ve been seeing Sir Tyronne a couple of times sa ABS CBN. Nakikita ko po na siya dati pa at very hands-on siya, very dedicated… kasi kami pong lahat, everybody ay gustong mag-grow every day. Isa rin iyon sa nag-aano sa akin na reason na lumipat kay sir Tyronne, Kasi ako, lagi akong uhaw, lagi akong gutom sa challenges sa showbiz.

“Ako naman po, kapag may offer at alam kong makatutulong, pinag-uusapan po namin iyon,” wika ni Andrew na next year ay inaasahang hahataw lalo sa mga project sa showbiz.