Jela ‘di takot ma-overexposed

SUNOD-SUNOD ang paglabas ng pelikula ni Jela Cuenca pagkatapos ng 5-in-1 Patay kang Manyag Ka (na napapanood na sa Vivamax simula Sept 23) pero hindi siya nag-aalala na mao-over exposed o pagsasawaan.

Ani Jela pagkatapos ng private screening ng 5-in-1, hindi niya akalaing magsusunod-suod ang pagpapalabas ng kanyang mga pelikula. Pagkatapos kasi nitong 5-in-1, na kasama niya sina Wilbert Ross, Ava Mendez, Angela Morena at Rose Van Ginkle, na idinirehe ni GB Sampedro, mapapanood agad sa September 30 ang Girl Friday. Dito’y kasama niya sina Angeli Khang at Jay Manalo na idinirehe ni Joel Lamangan. Susundan agad ito ng Pabuya sa October 7 kasama sina Diego Loyzaga at Franki Russell na idinirehe ni Phil Giordano, at sa October 14 ipalalabas ang Relyebo  kasama sina Christine Bermas at Sean de Guzman. Kaya pawang may Jela Cuenca festival, ha ha ha.

“Ako naman, basta trabaho lang nang trabaho. Natutuwa nga akong hindi ako nababakante at sunod-sunod ang projects na ibinibigay ng Viva sa akin kasi tumutulong ako sa family ko,” ani Jela.

At iginiit ng dalaga na nakatitiyak ang manonood na pawang iba-ibang atake ang ibinigay niya sa bawat karakter na ginagampanan niya. 

“I have to keep on reminding myself kung sino ang ginagampanan kong character sa isu-shoot ko that day. Iba-iba naman po ang characters ko.

At sa masasabi naming handa na si Jela na maging leading lady. Bagay sila ni Wilbert at kitang-kita ang chemistry nila. Bagamat kakaiba at marami silang sexy secenes sa pelikula, hindi naman iyon bastos kundi nakatatawa pa.

 “Sa ‘5-in-1’, ako si Lana Rose, isa sa limang babaeng pinagsasabay-sabay ni WIlbert Ross na isang successful businessman. Nang bigla siyang mamatay, ‘yung sister niyang madre, hinanap kung sino sa aming lima ang higit na karapat-dapat to inherit his businesses,” sambit pa ni Jela. (MVN)