Vince Maristela bagong aabangan sa GMA

RATED R
ni Rommel Gonzales

SI Vince Maristela ang itinuro ng kapwa niya Sparkle artist na si Raheel Bhyria na mas hunk sa kanilang dalawa kaya hindi niya ito lalabanan sa pagpapakita ng abs at katawan.

Hiningan namin si Vince ng reaksiyon sa sinabi ng kapwa niya Sparkada/Sparkle artist.

“Hindi mukhang siya ‘yung mas hot sa akin eh,” at natawa si Vince.

Naniniwala ba si Vince na wala dapat kompetisyon sa kanilang mga artista?

“Siguro ano mayroong, like, hindi ko sineseryoso masyado ‘pag, sa kanila kasi magkakaibigan kami and kakatapos lang namin sa project so wala pa. Hindi ko pa nakikita na competition sila Raheel, Saviour, kasi parang may kanya-kanya kaming project po.”

Ang isa pang Sparkada artist na si Saviour Ramos ay isa rin sa mga hunk ng Sparkle ng GMA Network. Isa sa mga cast member  si Vince sa Wattpad series na Luv Is: Caught In His Arms na collaboration ng Wattpad at GMA.

Samantala, ang Kapuso leading lady na si Bianca Umali ang crush ni Vince at nais makatrabaho in the future.

“Gusto ko lang ‘yung aura niya, ang lakas ng dating niya so parang, ewan ko, nasa-starstruck din ako,” ang tila nahihiyang muling pagtawa ni Vince.

Hindi pa niya nakikilala ng personal si Bianca.

Ano sa palagay ni Vince ang nakita sa kanya ng GMA para papirmahin siya bilang exclusive contract artist ng Sparkle?

“Siguro po ano, ‘yung personality ko rin po, sobrang laking factor niyon. Na marunong akong makisama, wala po akong pinipiling tao, mataas man o mababa.

“Like I treat them as equal, iyon lang po. And siguro masasabi ko funny ako. Ha! Ha! Ha!”