P5 dagdag pasahe hirit ng transport group

UMAASA ang isang transport group na magkaroon ng ‘sense of urgency’ ang pamahalaan at papayagan ang hirit na P5 (limang pisong) dagdag sa minimum fare na kanilang inihain noon pang Enero 2022.

Sa panayam sa programang Sa Totoo Lang sa One PH kagabi, nanawagan si Mar Valbuena,  pangulo ng transport group na MANIBELA, sa Land Transportation Franchising and Regulatory Board (LTFRB) na aprobahan ang hinihingi nilang P5 pisong dagdag sa minimum fare dahil wala nang kinikita ang mga jeepney driver bunsod ng walang humpay na oil price hike.

“Ang pinakahinihingi po natin, sana katorse pesos pero kahit dose pesos po malaking bagay na po samin dahil sa isang roundtrip makapagkakagarga na po kami ng dagdag na isang litro,” aniya.

Paliwanag ni Valbuena, noon pang 2019 ipinatupad ang siyam na pisong minimum fare na ang halaga ng isang litrong diesel ay P36 – 37 pa lamang.

Ngayon aniyang mahigit P80 kada litro ang presyo ng diesel o mahigit doble sa halaga noong 2018, nararapat lamang na madagdagan ang pasahe.

“Alam namin na nahihirapan din po ang ating mga mananakay. Mas mahirap kung ‘di kami makabibiyahe at ‘di po kami makapaghahatid ng serbisyo sa kanila kung kulang ang ikinakargang diesel talagang titigil kami,” sabi ni Valbuena.

“Marami po sating mga kasamahan ang nag-file ng increase talaga na didinggin po ito sa… nasa en banc na po ‘yung P5 pesos na increase na hinihingi natin e hehearingan daw po sa June 28 pa. Dapat naman po magkaroon po sana ng sense of urgency, hindi naman po tayo nag-uutos sa kanila, nakikisuyo po tayo, nakikiusap tayo na sana po sa mas lalong madaling panahon magawa po natin ito kasi ‘di natin alam baka next week tataas na naman po ito,” aniya.

Humihingi ng paumanhin si Valbuena sa mga pasahero kung sa kasalukuyan ay kulang ang mga bumibiyaheng pampublikong sasakyan dahil marami ang itinigil ang pagpasada dahil wala naman halos kinikita sa taas ng presyo ng diesel.

Unfair competition aniya ang programang Libreng Sakay ng pamahalaan dahil malaki ang natatapyas sa kita ng mga tsuper lalo na’t ang mga ruta nito’y sa mga lugar na may bumibiyaheng pampublikong sasakyan.

“Ang pakiusap po talaga namin, mapag-aralan po ‘yung mga pinaglalagyan ng libreng sakay. Sana doon sa marami talagang pasahero na kakaunti ang byahe o wala talagang biyahe sa lugar na ‘yun, doon na lang ilagay kasi kung magkakaroon ng parehong sasakyan, papasukin natin ‘yung isang ruta na mayroon nang bumibiyahe, papatayin naman natin yung mga bumibiyahe doon, saan po sila pupulutin?”

“Ang mahirap po roon, unfair competition kasi libreng sakay ‘yung kabila,” wika ni Valbuena. (ROSE NOVENARIO)