GM Antonio naghari sa GM Balinas Negros Open Chess Tournament

PINAGHARIAN ni Grandmaster (GM) Rogelio “Joey” Antonio, Jr. ng Quezon City ang katatapos na 2022 Grandmaster Rosendo Carreon Balinas Jr. Negros Oriental Open Chess Tournament na ginanap sa Lamberto Macias Sport Complex sa Dumaguete City, Negros Oriental nitong Linggo.

Tinalo ni Antonio si Ellan Asuela ng Bacolod City sa Armageddon tie breaker para makopo ang titulo at top prize na  P10,000. Nakamit naman ni Asuela ang runner-up prize P7,000.

Sina Antonio at Asuela ay kinakailangan maglaban sa Armageddon tie breaker matapos kapwa makapagtala ng tig 7.5 points sa 8 outings sa 2 day (April 16 and 17) event na nilahukan ng 98 woodpushers, hosted ni  Governor Roel Ragay Degamo.

Una munang tinalo ni Antonio si Bonn Rainauld Tibod ng Toledo City habang nakaungos naman si Asuela kay National Master Rommel Ganzon ng Mandaue City para sa paghaharap nila sa finals.