HATAW! D'yaryo ng Bayan hatawtabloid.com
ISANG election offense ang red-tagging o pagmamarka sa isang tao o mga grupo na sangkot sa komunistang grupo lalo na’t ginamit upang takutin at gipitin ang mga kandidato at mga tagasuporta.
Babala ito ni retired Commission on Elections (Comelec) commissioner Rowena Guanzon kasunod ng bintang ni Cavite Rep. Boying Remulla na ang mga nagpunta sa grand rally ni presidential candidate, Vice President Leni Robredo ay mga bayaran at ang iba’y mga aktibistang sinanay ng National Democratic Front (NDF).
Sa isang tweet, sinabi ni presidential bet Sen. Panfilo Lacson na nakababahala na maaaring magbuo ng coalition government si Robredo kasama ang CPP-NPA-NDF kapag nagwaging presidente ng bansa.
Si Lacson ang pangunahing nagsulong ng Anti Terror Law, ang batas na mariing tinututulan at kinuwestiyon ng iba’t ibang personalidad at cause oriented groups sa Korte Suprema.
“Red-tagging again? That’s old. And if you push it harder that is an election offense: intimidating harassing campaigners or supporters,” ani Guanzon sa isang tweet kamakalawa.
Alinsunod sa Omnibus Election Code, itinuturing na election offenses ang “threats, intimidation or putting others at a disadvantage in participating in a campaign.”
Ang Comelec ang may esklusibong kapangyarihan para magsagawa ng preliminary investigation ng lahat ng election offenses. (ROSE NOVENARIO)
