Owe My Love mapapanood na sa Netflix PH simula October 1

Rated R
ni Rommel Gonzales

TALAGANG mapapa-OML ang fans ng Team SenMig dahil mapapanood na nilang muli ang kilig, iyak, at tawa nina Sensen Guipit at Doc Migs sa Owe My Love. Magiging available na ito sa Netflix Philippines simula October 1. 

Ang hit romantic-comedy series ng GMA Public Affairs ay pinagbibidahan nina Lovi Poe at Benjamin Alves. Umiikot ang kuwento sa pagtataguyod ni Sensen sa kanyang pamilya sa pamamagitan sa pagpasok sa iba’t ibang raket. Makikilala niya ang heart surgeon na si Doc Migs na nag-aalaga sa kanyang Lolo Badong. Sa pagku-krus ng kanilang landas ay magkakaroon ng utang si Sensen kay Doc Migs at habang binabayaran ito, ang sukli sa kanilang dalawa ay unti-unting nagiging pag-ibig. Bukod sa kilig at tawa ay marami rin itong hatid na financial lessons sa manunuod.

Kasama rin sa masayang cast ng Owe My Love sina Aiai Delas Alas, Winwyn Marquez, Jackie Lou Blanco, Nova Villa, Ruby Rodriguez, Pekto Nacua, Buboy VIllar, Kiray Celis, Ryan Eigenmann, Jelai Andres, Jon Gutierrez, Jason Francisco, Divine Tetay, Terry Gian, at ang yumaong komedyante na si Mahal.