HATAW! D'yaryo ng Bayan hatawtabloid.com
NAUWI sa malagim na pagtatapos ang hostage drama na naganap sa pasilidad ng Bureau of Jail Management and Penology (BJMP) sa lungsod ng Marikina nang mapatay sa shootout ang dalawang persons deprived of liberty (PDL) nang mang-hostage ng dalawang nurse nitong Huwebes ng hapon, 26 Agosto.
Ayon kay Marikina City Mayor Marcy Teodoro, nagsasagawa ng medical check-up ang mga nurse sa mga preso nang agawan ng baril ang isang tauhan ng BJMP saka ini-hostage ang dalawang nurse sa ikalimang palapag ng pasilidad.
Tumagal ng 30 minuto ang negosasyon, hanggang makakita ng pagkakataon ang mga awtoridad at napatay ang dalawang PDL.
Kinompirma ni BJMP spokesperson Jail Chief Insp. Xavier Solda na nagtangkang tumakas ang dalawang PDL at nagawang mang-agaw ng armas mula sa isang jail guard.
Patuloy na nagsasagawa ng imbestigasyon ang BJMP kaugnay sa insidente.
