PINANGUNAHAN ni Mandaluyong City Mayor Menchie Abalos ang pamamahagi ng 200,000 “Ayuda ng Pasasalamat” na naglalaman ng grocery goods sa taunang “Pamaskong Handog” Christmas gift-giving event.

Ayuda-style na pamaskong handog ginawa sa Mandaluyong

hataw tabloid December 14, 2020 Lifestyle

IPINAGPATULOY ng pamahalaang lungsod ng Mandaluyong ang taunang Pamaskong Handog para sa mga residente.

Tinawag na Ayuda ng Pasasalamat, ito ay gagawin katulad ng paghahatid ng ayuda para maiwasan ang pagkakaroon ng pila at pagpunta ng maraming tao sa City Hall Complex dahil sa patuloy na umiiral na pandemya at para maiwasan ang biglang pagdami ng kaso ng CoVid-19.

Ayon kay Mayor Menchie Abalos, inihanda sa City Hall ang 200,000 gift packs na dinala sa bawat barangay at ang mga barangay officials ang maghahatid sa mga kabahayan.

“Wala na pong pilang mangyayari sa City Hall. At lahat po ng pamilyang nakatira sa lungsod ay mabibigyan kahit na kayo ay renter, sharer, o nakatira sa condo o subdivision.”

“Maituturing natin itong panghuling ayuda sa taong ito kaya lahat ng pamilyang Mandaleño ay bibigyan natin,” dagdag ni Mayor Abalos.

Kung dati ay binibigyan ng stub ang mga tatanggap ng Christmas gift pack, ngayon ay sabay-sabay na itong ibabahagi ng bawat barangay. Ito ay para masiguro na masusunod ang minimum public health protocols at maiwasan ang pagkukumpulan ng mga tao.

Ang mga tumanggap ng Pamaskong Handog ngayong taon ay mas marami kompara sa 65,000 indibidwal na nabigyan noong nakaraang taon.