Masahistang live-in inumbag ng musikero (Home service pinagselosan)

KULONG ang isang musikero matapos umbagin ang kinakasamang massage therapist dahil sa umano’y labis na selos matapos tumanggap ng home service ang biktima sa Malabon City, kamakalawa ng gabi.

Golpe sarado ang mukha at katawan ng biktimang itinago sa pangalang Jean, 46 anyos, residente sa Barangay Concepcion ng nasabing lungsod na kaagad dinala sa Ospital ng Malabon (OsMa) upang bigyan ng lunas ang mga sugat.

Batay sa ulat ng pulisya, dakong 11:00 pm, naganap ang insidente sa kahabaan ng Jacinto St., ng nasabing barangay.

Hindi pa man nakababa sa  sinakyang electronic trike  sinalubong na siya ng kanyang kinakasamang si Diomar Cagud, 39 anyos, musikero, at agad na hinablot sa buhok bago tatlong ulit na pinagsasapak sa ulo.

Humingi ng tulong ang biktima sa mga nagrorondang barangay tanod na nagresulta sa pagkakadakip sa suspek.

Batay sa imbestigasyon ng pulisya, tumanggap ng home service ang massage therapist sa kabila ng pagtutol ng kanyang kinakasama kaya nang umuwi ng kanilang bahay ay kaagad siyang sinalubong ng galit na galit na suspek at sinaktan.

Kasong physical injury na may kaugnayan sa paglabag sa RA 9262 o ang Violence Against Women and their Children Act ang isinampa ng biktima laban sa kinakasama. (ROMMEL SALES)