Bike tinangkang nakawin kelot deretso sa presinto

KALABOSO ang 35-anyos lalaki nang maaktohang ginagamitan ng bolt cutter ang naka-padlock na bisikleta upang tangayin sa entrance gate ng Pasay Public Market sa Pasay City, nitong Sabado ng gabi.

Nakakulong sa Pasay Police Station ang suspek na si Rey Bandalan, residente sa 1418 Tramo St., Barangay 46, Pasay City sa reklamo ng biktimang si Jomari Bendicio, 26 anyos, sales promoter, residente sa 1385 B2 Gomez St., Paco, Maynila.

Base sa ulat ng Sub-station 3 ng Pasay Police Station, dakong 6:15 pm nitong Sabado, 15 Agosto, nang hulihin ang suspek sa entrance gate ng nasabing palengke.

Sa reklamo, ang biktima ay pauwi mula sa mahabang oras ng trabaho at binalikan ang ipinaradang mountain bike nang maaktohan ang suspek na kinakalas ang lock gamit ang bolt cutter kaya agad humingi ng assistance sa nakatalagang security guard.

Hinuli ni Eduardo Padilla, guwardiya, ang suspek saka sa isinuko sa nasabing presinto.

Babala ng pulisya, ngayong kabilang na ang bisikleta sa laganap na ginagamit bilang transportasyon lalo ng mga nagtatrabaho, siguraduhing sa ligtas na lugar ito ipaparada para hindi manakaw kahit naka-lock.

(JAJA GARCIA)