Ai Ai napraning, naligo sa labas ng bahay

NAMIGAY ng tinapay sa mga barangay si Ai Ai de las Alas noong kasagsagan ng pandemya sa bansa. Pero hindi na niya ito ipinost sa kanyang social media account.

“May nagpa-selfie sa akin kahit naka-mask kami! Ha! Ha! Ha! Hindi ko na ipinost ‘yon kasi hindi naman ako ganoon!” saad ni Ai Ai sa Zoom interview niya.

‘Yung tinapay niyang ube cheese pandesal ay pinagkakakitaa niya ngayong naudlot ang taping ng Kapuso series na Owe My Love.

Gaya ng ilang tao, nakaranas din ng kapraningan ang Comedy Quen noong lockdown.

“Eh nang puwede nang lumabas, lumabas ako ng bahay. Eh dahil sa kapraningan, bago pumasok ng bahay, naligo ako sa labas ng bahay! At saka ko lang naalala na wala pala akong damit na isusuot! Ha! Ha! Ha!” chika ni Ai Ai.

Sa totoo lang, bahagi na ng GMA Artist Center si Ai Ai na pumirma ng kontrata kamakailan. Pero walang conflict ito sa management niyang Asian Artist Agency ni Boy Abunda.

Gusto nga niyang makasama si Alden Richards sa isang series.

“Pero hindi ko siya boyfriend, huh! Mag-ina ang role namin dahil baka ma-bash ako ‘pag lumabas na dyowa ko siya! Ha! Ha! Ha!” deklara ng Comedy Queen.

I-FLEX
ni Jun Nardo