Tsinoy binoga sa mukha dahil sa away trapiko

INOOBSERBAHAN sa isang ospital sa Maynila ang isang Chinese national na binaril ng isang nakaaway sa trapiko nitong Linggo ng madaling araw sa Ermita, Maynila.

Kinilala ang biktima na si Wenyan Shao, 43, may-asawa, negosyante  at residente sa Binondo, Maynila.

Nakatakas ang hindi pa kilalang suspek, sakay ng isang motorsiklo na kulay orange at black, walang plaka.

Nangyari ang insidente, 1:15 am nitong Linggo sa P. Burgos Drive northbound sa harap ng National Museum sa Ermita, Maynila.

Sa pahayag ng testigong si Leo Gambala, 22, valet, residente sa Quezon Boulevard, Brgy. 464 Zone 46, Sampaloc, Maynila, binabagtas niya ang P. Burgos Drive, malapit sa Planetarium at Round Table, Ermita, Maynila sakay ng kanyang motorsiklo nang mapansin na nagtatalo ang biktima at ang suspek.

Sakay ng Toyota Camry black, may plakang AAJ 8159 ang biktima habang nakamotorsiklo ang suspek.

Pagsapit sa traffic light sa National Museum sa Finance Road kanto ng P. Burgos St., Ermita, Maynila pansamantalang tumigil ang dalawa dahil sa red light.

Dito na bumunot ng baril ang suspek at saka inasinta ang biktima dahilan upang bumangga sa center island sa KKK monument.

Matapos ang insidente tumakas ang suspek  sa kahabaan ng P. Burgos Drive., patungong Quezon Blvd, Quiapo, Maynila.

Agad humingi ng tulong si Gambala sa pulisya na siyang nagdala sa biktima sa pagamutan na tinamaan ng bala sa kanang pisngi.