HATAW! D'yaryo ng Bayan hatawtabloid.com
HINDI nahirapan si Rocco Nacino na pawang mga Kapamilya actor ang kasama niya sa pelikulang Write About Love tulad nina Miles Ocampo, Joem Bascon, at Yeng Constantino mula TBA Studios.
Ani Rocco, si Joem ay kaibigan niya at sina Miles at Yeng ang first time lamang niyang nakatrabaho kaya naman personal siyang nagpakilala sa mga ito.
Hindi naman siya nahirapan sa dalawang Kapamilya aktres lalo na kay Yeng na pareho niyang mahilig sa kape.
Isa si Rocco sa masuwerteng Kapuso dahil nakakatrabaho niya ang mga aktor mula ABS-CBN at GMA 7. Aniya, “Happy ako at sana more projects. At ang laki ng tulong na naging successful ang pelikula ni Alden (Richards) lalo siyang magbubukas ng windows and opportunities para sa amin na mag-work sa ibang network.
“Dahil din doon parang pawala ng pawala ang network war kasi kaya na natin gumawa ng quality movies. We have the same goals to make quality movies. Maraming mababago,” anang aktor.
Idinagdag pa ni Rocco na mas healthy din ang walang network war dahil mas marami ang magkakaroon ng trabaho.
“This movie (Write About Love) will prove na kaya namin (mag-work) kahit magkaiba ng network,” giit pa ni Rocco.
Sa kabilang banda, puring-puri naman niya si Miles sa pagiging witty nito. “Hindi ko nga masabayan eh. Magaling siyang makipagbatuhan. At saka gusto niyang maging scriptwriter talaga eh. Maganda na maiba naman at sana hindi lang dito magtapos (ang pakikipagtrabaho sa ibang network).”
Ukol naman sa personal na buhay, sinabi ni Rocco na hindi pa sila magpapakasal ng kanyang GF dahil marami pa siyang trabahong dapat tapusin. “Kailangan ko ring tapusin muna ang bahay,” giit niya na 70-80 percent pa lang ito. “Kaya hataw ako sa trabaho muna. Tapusin ko muna ang lahat ng natanguan ko at focus muna sa work,” kuwento pa ng aktor.
Ang Write About Love ay co-written at idinirehe ni Crisanto B. Aquino na directorial debut na nilapatan ng musika ni Jerrold Tarog.
Bago ang Write About Love, si Aquino ay kilala bilang country’s most sought after 1st Assistant Director na nakatrabaho na nina Chito Roño, Olivia Lamasan, Rory Quintos, Laurice Guillen, Cathy Garcia-Molina, at Jerrold Tarog.
Ang pelikula ay produce ng Tuko Film Productions, Buchi Boy Entertainment and Artikulo Uno Productions.
SHOWBIZ KONEK
ni Maricris Valdez Nicasio
