HATAW! D'yaryo ng Bayan hatawtabloid.com
BAGAMA’T wala pang inire-release ang Star Cinema ng eksakto’t opisyal na figures ng kinita ng JoshLia movie sa takilya ay aminado si Kris Aquino na malagihay na tinanggap ito ng mga manonood.
Kung standards nga naman ng Star Cinema ang gagawing basehan, roughly ang P40-M na kinita ng pelikula sa ilang araw ng showing nito’y mababa kaysa inaasahan, considering na tampok pa mandin ang isa sa mga sikat na loveteam ng bansa.
Idagdag pa ang pagkakasama ni Kris sa movie, kaya ang tanong kung bakit “sumemplang” pa rin ito ay: Anyare???
Sa kanyang social media account ay inako ni Kris ang kinahinatnan ng pelikula, huwag daw ibunton ang sisi kina Julia Barretto at Joshua Garcia.
Bigla tuloy gumuhit sa aming nahihimbing na alaala ang pagiging flop din ng huling pelikula ni Ai Ai de las Alas sa Star Cinema bago siya nagdesisyong lumipat sa GMA, ang Past Tense na pinagbibidahan ng isa pa ring sikat na tambalang Kim Chiu at Xian Lim.
Sa halip kasi na isulong ang Kim-Xian loveteam ay mas napag-usapan noon ang pakikipagrelasyon ni Ai Ai sa nobyo pa lang na si Gerald Sibayan, mas bata sa kanya nang humigit kumulang na 30 taon.
Bad trip si Ai Ai nang ipatawag siya ng management, akala niya’y isang mahalagang agenda ng pagmimitingan nila. Pero ‘yun pala’y para sabihan lang siya ng mga bossing na kaya sumemplang ang Past Tense ay dahil sa kanya at “pagpo-promote” ng kanyang May-December affair.
May paralelismo kaming nakita agad sa promo campaign ng comeback movie ni Kris.
Bagama’t todo-promote naman ang mga bagets ng kanilang movie, hindi maitatatwa ang katotohanang sapaw na sapaw ito ng mga isyu tungkol kay Kris lalong-lalo na ang naunsiyami nilang relasyon ni QC Mayor Herbert Bautista.
Hindi nga naman bahagi si Bistek ng pelikula pero gamit na gamit ang pangalan ng Golden Boy.
Dating mag-BFF sina Kris at Ai Ai na ngayo’y may kanya-kanya nang buhay.
Pero mukhang pinagtitiyap pa rin sila ng kapalaran sa sinapit ng kani-kanilang mga pelikula, noon at ngayon.
Nagbabadya kaya ito na pagdating ng araw ay sila pa rin ang mag-BFF? Sabi nga ni Ara Mina, “You can never can (sic) tell.”
HOT, AW!
ni Ronnie Carrasco III
