HATAW! D'yaryo ng Bayan hatawtabloid.com
HINDI pa nga mapanindigan ang basehan sa pagpapatalsik kay Supreme Court Chief Justice Maria Lourdes Sereno, heto ipinasibak na ni Ombudsman chief Conchita Carpio Morales si Rep. Gwen Garcia ng Cebu dahil sa kuwestiyonableng pagbili ng P100-milyong Balili Property sa Tinaan, Naga, Cebu.
Klaro umano sa dismissal order ang parusang habambuhay na diskuwalipikasyon sa public office, kanselasyon ng eligibility, at tuluyang pagpalis sa retirement benefits.
Nauna nang ipinahayag ng Office of the Ombudsman sa kanilang press statement kahapon ang pagsibak kay Madam Gwen.
At inuutusan ni Madam Conchita Carpio si House Speaker Pantaleon Alvarez para ipatupad ang dismissal order.
Ang kaso ay nag-ugat sa propriedad na binili ni Rep. Gwen noong 11 Hunyo 2008 noong siya ang gobernador ng Cebu.
Ayon sa ulat ng Rappler, ito ang 249,246-square-meter Balili property sa Tinaan, Naga, Cebu sa halagang P98,926,800.
Kalahati ng propriedad (196,696 square meters) ay bahagi ng mangrove area.
Noong Abril 2012, nagsagawa ng public bidding ang local government para sa supply at delivery ng panambak para sa mga nakalubog na lugar kabilang ang mangrove portions. Iginawad ang kontrata sa Supreme ABF Construction.
Dahil ang Supreme ABF Construction ang nag-alok ng pinakamababang presyo, binayaran sila ng provincial gov’t ng P24,468,927.66.
Pero natuklasan ng Ombudsman, na si Garcia ay hindi binigyan ng awtoridad ng Sangguniang Panlalawigan (SP) para makipagkontrata sa ABF Construction.
Klaro umano, ayon sa Ombudsman na nilabag ni Garcia ang Administrative Code of 1987 at ang Government Auditing Code of the Philippines na rekisitos ang certification of appropriation and fund availability bago pumasok sa isang kontrata.
Pero ang rekesitos na ito ay ginawa lang ni Garcia matapos ang ikalawang kontrata.
Noong 2014, inabsuwelto si Garcia ng Court of Appeals gamit na basehan ang Aguinaldo Doctrine.
Ngunit ang Aguinaldo doctrine ay hindi aplikable sa mga kasong kriminal laban sa elected official.
Magugunitang bilang deputy speaker, si Garcia ay ex-officio member ng makapangyarihang House justice committee, na dumidinig sa impeachment complaint laban kay Chief Justice Maria Lourdes Sereno.
Pero ‘yun nga, hindi pa napapatalsik si CJ Sereno, ‘e nauna pang nasibak si Rep. Gwen Garcia.
Ipatupad naman kaya ni House Speaker Pantaleon Alvarez ang dismissal order laban kay Rep. Garcia?
O gagayahin ni Speaker Alvarez ang ginawa ni Ombudsman Carpio nang hindi niya ipatupad ang suspensiyon ng Malacañang laban kay Overall Deputy Ombudsman Arthur Carandang?!
‘Yan ang aabangan natin…
BAKIT NAMAMAYAGPAG
ANG SAKLAAN SA TONDO
MPD DD GEN. JIGZ CORONEL?!
Bago at matapos ang piesta ng Poong Sto. Niño sa Tondo, Maynila, walang nagbabago sa hindi maipaliwanag na namumunining mga saklaan sa iba’t ibang lugar sa Tondo, Maynila.
Marami tuloy ang nagtatanong, hindi na ba ilegal ang sakla sa Tondo?!
Kaya haping-hapi ang mga manlalaro ng ‘sotang bastos’ dahil kahit saang barangay sila mapunta sa Tondo ay nagkalat ang mesa ng sakla.
Dati makikita lang ang mga sakla sa mga burol ng patay.
Ngayon kahit walang pinaglalamayan, mayroong saklaan — 24/7 pa!
Wattafak!?
Ano na ba ang nangyayari si Tondo, Gen. Jigz Coronel?!
Masyado bang ‘sacred cow’ ang mga saklaan na ‘yan kaya kahit ang mga barangay official ay hindi sila mapakialaman kahit nakaharap mismo sa barangay hall?!
Ang husay! Napakainam naman pala ng peace and order sa Tondo, Gen. Jigz?!
Hindi ba naipaaabot sa inyo ‘yan ng mga intelehensiya ‘este mali’ intelligence officers ninyo?!
Subukan n’yo kayang magrekorida riyan sa kahabaan ng Sta. Maria, Yangco, Velasquez at Bangkusay streets Gen. Jigz.
Diyan ninyo hayagang makikita na parang legal na legal ang operasyon ng saklaan sa Tondo — 24/7, sa kanto ng kani-kanilang barangay hall.
Bakit hindi magalaw-galaw? Masyado bang maimpluwensiya at malakas sa ‘itaas’ ang maintainer nito?
Pakisagot nga po. Gen. Jigz Coronel?!
BUREAU OF CUSTOMS
PINURI NI PANGULONG
DIGONG DUTERTE
WALANG mapagsidlan ng tuwa ang mga taga-Bureau of Customs (BoC) sa pagkilala ni Pangulong Rodrigo “Digong” Duterte sa kanilang accomplishments nitong nakaraang Miyerkoles nang ipagdiwang ang kanilang 116th anniversary.
Pinuri ni Pangulong Digong ang mga opisyal ng BoC sa pamumuno ni Commissioner Isidro “Sid” Lapeña.
Sa accomplishment reports, masayang iniulat ni Commissioner Lapeña, na-hit ng BoC ang all-time high revenue collection na umabot sa P46.37 bilyones noong Nobyembre 2017.
Sa kabuuan ang BoC ay may aktuwal revenue collection na P456.61 bilyones, ito ang pinakamataas mula noong 2013.
Pero siyempre kahit pinuri ng Pangulo, pinaalalahanan din niya ang BoC officials na marami pang kailangang gawin upang mapaunlad pa ang buong Bureau.
Anang Pangulo, hindi kailangan bumitiw sa kampanya laban sa korupsiyon at smuggling ang Bureau gaya ng ipinakitang pagwasak sa 20 luxury vehicles na nagkakahalaga ng P61 milyones.
Kasabay nito, inihayag na rin ni Pangulong Digong ang bagong appointees niya sa BoC.
Ang mga bagong Presidential appointees ay sina Noel Patrick Sales Prudente bilang Deputy Commissioner; Jeoffrey Comising Tacio, Adzhar Aidarus Albani at Yogi Felimon Lasala Ruiz bilang Director III; at, Fernandino Acosta Tuason bilang Director II.
Sa lahat ng mga taga-Customs, congratulations po!
Kudos to Commissioner Sid Lapeña!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
