HATAW! D'yaryo ng Bayan hatawtabloid.com
PINAGTIBAY ng Senado nitong Miyerkoles ang report ng dalawang kapulungan ng Kongreso kaugnay sa pagsasabatas ng Tax Reform for Acceleration and Inclusion (TRAIN) bill.
Ang batas na ito ang sisiguro sa pagtaas ng take home pay ng mahigit pitong milyong manggagawa sa buong bansa.
Bagama’t nauna nang inaprobahan ng dalawang Kapulungan na ilibre sa buwis ang taunang sahod na may kabuuang P250,000 pababa, sinunod ng bicam ang bersiyon ng mababang kapulungan na naglalayong sa ikalawang bugso ng tax reform package ay mas babaan ang personal income tax rates pagdating ng 2023.
“Ibinaba na po natin ang kaltas sa buwis simula next year, pero may mas malaking ginhawa pang naghihintay pagdating ng 2023. Ito ay para hindi na mapag-iwanan ulit ng panahon ang tax rates na nagresulta sa napakataas na buwis na hindi na patas para sa mga ordinaryong manggagawa. Alinsunod din ito sa pangako ng administrasyong Duterte na huwag buwisan ang kumikita ng P20,000 pababa,” ayon kay Senator Sonny Angara, chairman ng Ways and Means Committee ng Senado.
Naunang napagkasunduan ng dalawang kapulungan na itaas ang tax exemption cap sa tinatanggap na 13th month pay at iba pang bonus ng mga empleyado, na mula P82,000 ay ginawang P90,000.
(NIÑO ACLAN)
