HATAW! D'yaryo ng Bayan hatawtabloid.com
PORMAL nang nagbukas ang sesyon ng Senado sa ilalim ng 17th Congress sa 2nd regular session nito, pinangunahan ni Senate President Koko Pimentel, at 19 pang senador.
Tanging sina Senador Antonio Trillanes, kasalukuyang nasa ibang bansa, at Senadora Leila de Lima, kasalukuyang nakakulong, ang wala sa sesyon ng Senado.
Dalawampu’t dalawa na lamang ang mga senador makaraan tanggapin ni dating Senador Alan Peter Cayetano ang pagiging kalihim ng Department of Foreign Affairs, at si Senadora Miriam Defensor-Santiago ay binawian ng buhay dahil sa sakit na kanser kamakailan.
Nagpapasalamat si Pimentel sa lahat ng mga kapwa senador, mga opisyal at empleyado ng Senado sa kanilang isang taon pagtatrabaho na hitik sa bunga.
Hindi naitago ni Pimentel ang pagmamalaki matapos mahirang ang Senado bilang “most trusted institution” batay sa isang lumabas na survey.
Sa talumpati ni Pimentel sa harap ng mga kapwa senador at mga panauhin na dumalo sa pagbubukas ng sesyon, ilan sa mga panukalang batas na magiging prioridad ng Senado ang mga sumusunod:
Tax reform for Acceleration and Inclusion Act (TRAIN), Anti-Terrorism Law, National ID System, Universal Health Care Act, Bangsamoro Basic Law (BBL), at Pederalismo.
Aminado si Pimentel, bagama’t iilan lamang ang naturang panukala na kanyang binanggit ay kakailangan ng mahabang panahon para sa pagtalakay ng mga ito.
Tiniyak ni Pimentel na dapat ding pagtuunan ng pansin ng Senado ang nakahaing 1,242 bills at 297 resolusyon.
Binigyang-linaw ni Pimentel, na normal lamang ang mayroong mga negatibo at paiba-ibang opinyon kaya nararapat na patuloy na mayroong minorya sa Senado upang magkaroon ng balanse at mabusisi nang husto ang mga opinyon at panukala ng mayorya.
Kaya sa huli ang sabi ni Pimentel, ngayong bumalik na sila sa sesyon ay dapat ding bumalik na sila sa kanilang trabaho. (NIÑO ACLAN)
