Magkaibigan todas sa Bonnet Gang

KAPWA binawian ng buhay ang magkaibigan, dating sangkot sa ilegal na droga, makaraan pagbabarilin ng apat lalaking nakasuot ng bonnet sa Quezon City, kamakalawa ng gabi.

Sa ulat kay Quezon City Police District (QCPD) director, Chief Supt. Guillermo Lorenzo T. Eleazar, kinilala ang napatay na sina Ma-nuel Fajardo, 34, at Ramon Nisa, 35, kapwa residente sa Bayanihan St., Don Fabian Village, Brgy. Commonwealth, ng nabanggit na lungsod.

Sina Fajardo at Nisa ay kapwa hindi umabot nang buhay sa East Avenue Medical Center dahil sa mga tama ng bala  sa kanilang katawan.

Dakong 10:00 pm nang pasukin ng mga suspek ang bahay ng dalawang biktima.

Naglalaba si Fajardo habang kausap si Nisa nang pasukin ng mga suspek ang kanilang bakuran at sila ay pinagbabaril.

Pagkaraan ay mabilis na tumakas ang mga suspek lulan ng dalawang motorsiklo.

Ang dalawa ay dati nang sumuko sa pulisya kaugnay sa pinatutupad na Oplan Tokhang.

(ALMAR DANGUILAN)