HATAW! D'yaryo ng Bayan hatawtabloid.com
ZAMBOANGA CITY – Sugatan ang isang Army Scout Ranger at ang driver ng alkalde, sa magkasunod na pagsabog ng bomba sa Sitio Sawiti, Brgy. Calut, sa munisipyo ng Tuburan, lalawigan ng Basilan, kahapon.
Ayon kay Maj. Gen. Carlito Galvez, Jr., commander ng Western Min-danao Command (WestMinCom), nangyari ang pagsabog habang nagsasagawa ng joint medical and dental activities, ang mga sundalo ng 3rd Socut Ranger Battalion, kasama ang municipal government ng Tuburan kahapon.
Kinilala ang nasugatang sundalo na si Cpl. Christian Ibarreta, at ang driver ni Tuburan Municipal Mayor Dorie Kallahal, na si Misuari Jamiri.
Nawasak ang ilang bahagi ng sasakyan ni Mayor Kallahal dahil sa pagsa-bog.
Napag-alaman, unang sumabog sa bomba, ilang metro ang layo mula sa lugar nang pinagdarausan ng medical activity. Agad itong pinuntahan ng mga sundalo, at ilang saglit lamang makaraan, sumabog ang pangalawang bomba sa hindi kalayuan.
Narekober ng mga kasapi ng Explosive Ordnance Division (EOD), mula sa lugar ng pagsabog, ang dalawang piraso ng circuit, isang handled radio, dalawang battery, at 20 metro ng electric wire.
