HATAW! D'yaryo ng Bayan hatawtabloid.com
TUMIKLOP si ousted president at convicted plunderer Joseph “Erap” Estrada a.k.a. Asiong Salonga kay Pangulong Rodrigo Duterte a.k.a. The Punisher nang maglitanya nang mahigit kalaha-ting oras ang Punong Ehekutibo laban sa illegal drugs sa harap ng 1,400 al-kalde kamakalawa ng gabi sa Palasyo.
Sinabi ng source na kasama sa controversial at confidential meeting ni Pangulong Duterte sa mga mayor, walang kibo si Erap nang bigyan-diin ni Duterte ang ngit-ngit sa pagkakasangkot ng ilang lokal na opisyal sa operasyon ng illegal drugs.
Duda ng source, posibleng nagpasya si Erap na huwag nang humirit at baka mapagdiskitahan pa siya ni Duterte lalo na’t nagalit nang todo ang Pangulo nang makompiska ang P6-bilyong halaga ng shabu ng National Bureau of Investigation (NBI) sa isinagawang raid sa isang shabu laboratory sa San Juan City noong 23 Disyembre.
Gusto ng Pangulo na pagbabarilin na lang ang mga suspek na nadakip sa nasabing raid na karamiha’y Chinese.
Mahigit apat dekada nang hawak ng pamilya Estrada ang poder sa San Juan City.
Napaulat na pinagbantaan ni Pangulong Duterte ang mga alkalde na sabit sa illegal drugs na magbagong buhay o kaya’y magbitiw sa puwesto kung ayaw nilang mamatay.
Ngunit ayon kay Communications Secretary Martin Andanar “heart-to-heart talk” ang naganap na pulong ni Duterte at mga alkalde.
“Heart-to-heart talk. Wala pong napag-usapan na mga tit-for-tat, wala hong ganyan. Si President Digong ho ay he is very straight and very straight forward when it comes to talking to people, lalo na iyong mga official. So iyong pinakapinag-usapan ho riyan — of course, we are getting varied reports from different mayors also who were connected to the media. Pero ang ano ko na lang po…take is that I’ll ask the Presidential Spokesperson to give us an official statement,” ani Andanar.
Hanggang sa isinusulat ang balitang ito ay wala pang inilalabas na opisyal na pahayag si Abella kaugnay sa isyu.
ni ROSE NOVENARIO
