HATAW! D'yaryo ng Bayan hatawtabloid.com
PATAY ang dalawang hinihinalang holdaper at tulak na responsableng sa pagpaslang sa isang OFW nitong Biyernes, nang lumaban sa mga pulis sa follow-up operation kahapon ng madaling-araw sa Quezon City.
Sa inisyal na ulat kay QCPD Director Sr. Supt. Guillermo Lorenzo T. Eleazar, mula sa CIDU, kinilala ang mga napatay na sina alyas “Rodman” at alyas “Inggo” kapwa hinihinalang dayong tulak sa squatters areas sa UP Arboretum.
Ayon kay Supt. Rodel Marcelo, hepe ng CIDU, dakong 3:15am nang salakayin ng kanyang mga tauhan sa pangunguna ni SPO3 Roberto Ramirez, ang pinagtataguan ng mga suspek sa squatters area likurang bahagi ng UP Technohub sa UP Arboretum.
Ngunit nakipagpalitan ng putok ang mga suspek sa mga pulis na nagresulta sa kanilang pagkamatay.
Ayon kay Marcelo, ang dalawa ang itinuturo ng mga saksi na pumatay sa biktimang si Russel Calbonero sa loob ng Hair Stage Saloon sa 30 Unit 8, V. Luna Extention, Brgy. Malaya, Quezon City nitong Nobyembre 4, 2016.
( ALMAR DANGUILAN )
