Most wanted sa Calamba utas sa shootout

PATAY ang isang lalaking itinuturing na most wanted criminal, makaraan makipagpalitan ng putok sa mga pulis kamakalawa ng gabi sa Laguna.

Ang suspek na si Rosano Lirio alias Totoy ay sisilbihan sana ng arrest warrant para sa kasong murder pasado 10:00 pm nang paputukan niya ang papalapit na mga pulis sa kanyang safehouse.

“Napansin niya na may mga tao na papalapit dun sa kanyang bahay at agaran nitong pinaputukan ‘yung mga pulis natin. At alam naman natin itong taong ito talagang lumalaban sa pulis. So napilitan ang mga pulis natin para ‘yung last resort natin para maidepensa ‘yung sarili nila,” pahayag ni Supt. Albert Tapulao.

Ang arrest warrant para kay Lirio ay bunsod nang pagpatay kay PO2 Alvin Asignado noong 2015.

Si Lirio ay sinasabing miyembro ng gun-for-hire group. Kabilang din siya sa drug watchlist sa nasabing lalawigan.