Gil Cuerva, isa sa pinagpipilian para maging Matteo Do ni Jen

ANG isa sa pinagpipiliang maging leading man ni Jennylyn Mercado sa Koreanovela na gagawan ng Pinoy version na My Love from the Star ay si Gil Cuerva na isang print at commercial model.

Sitsit ng aming source na isa si Gil sa nag-audition para sa role na Matteo Do sa seryeng pagbibidahan ni Jennylyn pero hindi pa siya sure kung papasa dahil tatlo raw silang pagpipilian at dadaan pa sa matinding workshop.

Si Jonas Gaffud daw ang nakadiskubre kay Gil pero hindi naman siya pinapirma ng kontrata kaya balita namin ay nasa Cornerstone Talent Management ang binata.

Kuwento pa ng aming source, ”nag-audition ‘yan si Gil kina direk Joyce (Bernal) kasi siya ang direktor ng ‘My Love from the Stars’, sa mga executive ng GMA at nandoon din si Jennylyn para makita rin naman niya ang makakasama niya.

“Maraming bumoto kay Gil, kasi guwapo naman, chinito at bagay naman sa kanya ang role kasi hindi naman need ng matinding acting, ‘di ba? Ano sa tingin n’yo bagay ba siya sa papel na Matteo Do?”

Ni-research namin kung sino si Gil Cuerva at oo nga Ateng Maricris, guwapo at Tisoy bukod pa sa malaki ang hawig kay Borgy Manotoc.

FACT SHEET – Reggee Bonoan